Почетокот на октомври ќе донесе драстична промена на времето во Европа. По потоплиот период, силен антициклон на северот отвори пат за навлегување на ладни маси од исток. Според Severe Weather Europe, оваа недела континентот го очекува првиот голем студен бран на есента.
Од средината на неделата, огромен студен базен ќе се движи кон Централна Европа, Балканот и Медитеранот. Температурите ќе паднат и до 10 степени под просекот, а студениот бран ќе донесе силен дожд по западниот Балкан, снег на планините и прв мраз во низините.
Врвот на студот се очекува меѓу четврток и сабота, кога воздухот ќе биде за 8–12 степени поладен од нормалното, а локално и до 15. Германија, Чешка, Полска, Австрија, Унгарија, Романија, Италија, Словенија, Хрватска и земјите од Западен Балкан ќе ги почувствуваат најголемите промени.
Во четврток и петок наутро во Централна Европа ќе се појави првиот мраз, а за викендот Балканот ќе влезе во најстудениот период досега – со температури од -2 до -4 во Хрватска и до -6 степени во Босна, Црна Гора и Србија.
