Израелскиот премиер Бенјамин Нетанјаху се извини на Катар и вети дека Израел нема повторно да го наруши неговиот суверенитет, по нападот врз претставници на Хамас во Доха кој предизвика смрт на еден катарски државјанин, објави 4NEWS.mk.
Во телефонски разговор со катарскиот премиер, а во кој учествувал и американскиот претседател Доналд Трамп, Нетанјаху изразил жалење за инцидентот и потврдил дека Израел нема да изврши сличен напад во иднина.
„Лидерите разговараа за предлогот за завршување на војната во Газа, перспективите за побезбеден Блиски Исток и потребата од поголемо разбирање меѓу нивните земји,“ соопшти Белата куќа, нагласувајќи дека станувало збор за трилатерален телефонски разговор.
Катарското Министерство за надворешни работи потврди дека примило уверување од Нетанјаху за почитување на нивниот суверенитет, додека Белата куќа најави прес-конференција меѓу Трамп и Нетанјаху на оваа тема.
