Кандидатот за градоначалник на Скопје, Орце Ѓорѓиевски, заедно со кандидатката за градоначалник на Кисела Вода, Бети Стаменкоска Трајкоска, и директорот на Агенцијата за катастар и недвижности, Иван Живковски, денеска изврши увид во градежните активности на улицата „Ѓорѓи Димитров“.
Започна втората фаза од реконструкцијата на оваа сообраќајница, која е една од најзначајните во Кисела Вода и Скопје. Првиот дел, на потегот од „Народни Херои“ до „14 Декември“, веќе е завршен со нов асфалт, тротоари и современ паркинг со капацитет од околу 40 возила кај Домот за слепи лица „Димитар Влахов“.
Во тек е работата на вториот дел, од „Народни Херои“ до „Божидар Аџија“, каде што се врши целосна реконструкција со ново асфалтирање и изградба на пешачки површини со павер елементи.
Проектот е поддржан од Владата на Република Македонија преку Министерството за транспорт и врски и претставува дел од програмата за реализација на капитални проекти. Ѓорѓиевски најави дека улицата „Ѓорѓи Димитров“ е само една од вкупно 14 големи инфраструктурни инвестиции што се реализираат со цел подобар и посовремен град.
„Со оваа инвестиција жителите на овој дел од Кисела Вода и Скопје конечно ќе добијат подобри услови за живот и поудобен, побезбеден сообраќај“, истакна Ѓорѓиевски.
