Лидерот на ВМРО-ДПМНЕ и премиер Христијан Мицкоски на митинг во Струга изјави дека по локалните избори ќе се фокусира на реформите во судството и обвинителството, кои, како што рече, се „последниот бастион на криминалот“ што ги штитат СДСМ и ДУИ.
„Секој случај кој сме го предочиле со докази завршува без обвинителен акт против поранешни функционери. Аргатите на СДСМ и ДУИ во судовите и обвинителствата се грижат тоа да остане така. По изборите следуваат промени кои ќе ја донесат правдата во државата“, истакна Мицкоски.
Тој обвини дека во Струга постојат тајни договори меѓу Левица и ДУИ со цел ДУИ да остане на власт и во следниот мандат, при што го критикуваше кандидатот на Левица дека не поднел оставка од пратеничкото место, иако претходно тоа го ветил.
Мицкоски ги повика стружани да ја поддржат советничката листа на ВМРО-ДПМНЕ, предводена од професорот Коста Хиохи, како „вистинскиот избор за Струга“ и како алтернатива на „темното минато на криминалот и корупцијата“.
Хиохи ја презентираше програмата на советничката листа која вклучува реконструкција на водоводната мрежа, решавање на проблемот со дивите депонии, изградба на катни гаражи и нова градинка, како и зачувување на старата струшка архитектура. Според него, овие проекти треба да обезбедат подобар и поквалитетен живот за жителите на Струга.
