Украинскиот претседател Володимир Зеленски соопшти дека еден од генераторите што ја снабдуваат нуклеарната електрана Запорижја, моментално под контрола на Русија, откажал. Тој истакна дека електраната е исклучена од украинската мрежа поради руски напади и моментално се снабдува со електрична енергија од дизел-генератори, кои не се наменети за долгогодишна работа во ваков режим.
„Ситуацијата е критична. Русите со своите напади спречуваат поправка на далекуводите и обновување на основната безбедност. Ова претставува закана за сите“, изјави Зеленски во вечерното обраќање, додавајќи дека владата е задолжена да го информира светот за состојбата.
Шефот на Државниот инспекторат за нуклеарна регулација, Олег Кориков, потврди дека електраната е исклучена од мрежата веќе шест дена и дека резервните дизел-генератори го снабдуваат само критичниот систем со електрична енергија.
Генералниот директор на Меѓународната агенција за атомска енергија (IAEA), Рафаел Гроси, исто така ја потврди ситуацијата и најави дека агенцијата работи на обновување на снабдувањето со енергија.
Нуклеарната централа Запорижја, најголемата во Европа со шест реактори, од почетокот на инвазијата е под контрола на руски окупатори и стана ново жариште во преговорите меѓу Русија и САД.
