Делегацијата на Европската Унија во Северна Македонија нагласи дека сите политички партии треба да имаат еднаков и фер пристап до медиумите. Ова доаѓа во контекст на одлуката на Агенцијата за аудио и аудиовизуелни медиумски услуги (АВМУ), со која на партијата Левица ѝ е ускратено финансирање за политичко рекламирање и пристап до националните телевизии, освен на Собранискиот канал.
Од ЕУ Делегацијата истакнуваат дека националните власти се тие што треба да одлучат по жалбата за платено политичко рекламирање, но нагласуваат дека Европската Унија постојано ги повикува властите да ги спроведат препораките на ОДИХР за ревизија на Изборниот законик, особено во делот за медиумски пристап и финансирање на кампањите.
„Обезбедувањето еднаков и транспарентен пристап до медиумите е од суштинско значење за демократијата и за евроинтеграцијата на земјата“, велат од Делегацијата.
Во врска со новопредложената Резолуција за „црвените линии“ во спорот со Бугарија, ЕУ истакнува дека е важно сите политички партии да работат заеднички и да обезбедат консензус кој ќе овозможи напредок на земјата на патот кон ЕУ.
„Политичките сили треба да соработуваат за консолидиран консензус насочен кон европската иднина, напредок во реформите и опипливи придобивки за граѓаните“, порачаа од ЕУ Делегацијата.
