Грција денес е во 24-часовен генерален штрајк, повикан од најголемите синдикални конфедерации GSEE и ADEDY, во знак на протест против новиот закон за работни односи.
Во штрајкот учествуваат вработените во јавниот сектор, образованието, транспортот, како и таксистите. Метрото и трамвајот во Атина ќе работат ограничено од 9 до 17 часот, додека автобусите и тролејбусите ќе сообраќаат со прекини. Железничкиот и приградскиот сообраќај се целосно прекинати, но летовите продолжуваат непречено, откако судот пресуди дека контролорите на летање не смеат да учествуваат во штрајкот.
Протестите ќе се одржат на плоштадот Клафтмонос во Атина во 11 часот, како и во други големи градови низ земјата. Синдикатите бараат повлекување на законот за продолжување на работниот ден, враќање на 13-тата и 14-тата плата, колективни договори и намалување на работната недела на 35 часа.
