На првиот ден од предизборната кампања за локалните избори, независниот кандидат за градоначалник на Битола, Зоран Николовски, ја отвори својата изборна канцеларија на Широк Сокак.
Николовски, кој ја доби поддршката од политичката партија „Левица“, го истакна своето мото: „Време е за архитект“. На отворањето присуствуваа пратеничката Јована Мојсоска и советниците од „Левица“ Горан Велевски и Гаврил Трајковски.
Во својата програма, Николовски најави Битола како град за сите – туристички ориентиран, со здрава храна во секое училиште, еко-град, со развиено земјоделство и сточарство, видео надзор, паркови, зелени површини и грижа за највозрасните.
Тој посочи дека градежната механизација и инженерскиот кадар на Општина Битола ќе работат непрекинато за реализација на капитални објекти, улици, урбана опрема и паркови, со цел градот да се гради брзо, ефикасно и квалитетно.
„Сè што сум презел како обврска на моето работно место е завршено. Сега е време Битола да се гради за сите нас“, изјави Николовски.
