Нуклеарната електрана во Чернобил остана без електрична енергија поради руско гранатирање во близина на градот Славутич, објави украинското Министерство за енергетика. Иако централата не е во функција, ситуацијата е оценета како изванредна, бидејќи новата безбедносна конструкција која го изолира уништениот четврти реактор останала без струја.
Гранатирањето предизвикало масовни прекини во снабдувањето со електрична енергија во Чернихивската област, погодувајќи околу 307.000 корисници. Болниците и критичните институции биле снабдени со генератори, а екипи работат на отстранување на дефектите.
Министерството не посочи дека постои непосреден ризик од зголемена радијација, но предупреди дека напади врз енергетската инфраструктура ја зголемуваат ранливоста на објекти од ваков тип.
Несреќата во Чернобил се случи во април 1986 година и останува најтешката нуклеарна катастрофа во историјата. Околу реакторот беше изграден скафофаг, кој во 2016 година беше заменет со нова конструкција за да се спречи истекување на радијација.
Русија ја зазеде електраната на почетокот на инвазијата во 2022 година, а во февруари годинава руски дрон оштети дел од покривот на новата заштитна структура.
Украинските власти предупредуваат дека секое понатамошно оштетување може да отвори прашања за безбедноста на целиот регион.
