Скопје

Ѓорѓиевски најави „Град без депонии“ и нов резервоар за вода во Ѓорче Петров

Кандидатот за градоначалник на Град Скопје од ВМРО-ДПМНЕ, Орце Ѓорѓиевски, денеска се обрати од народниот митинг во општина Ѓорче Петров, во рамки на изборната кампања под слоганот „Вистинскиот избор! Твојот човек! Твоето место! За твојата иднина!“.

„Во Ѓорче Петров, ВМРО-ДПМНЕ ќе победи како никогаш досега. Ви благодарам однапред за поддршката и посветеноста, Скопје да го направиме градот кој повторно ќе биде нашата гордост. Ѓорче Петров ќе продолжи да се развива успешно, а по изборите и Скопје ќе заличи на убаво и пристојно место за живеење“, рече Ѓорѓиевски пред граѓаните.

Тој истакна дека како иден градоначалник ќе го даде својот максимум и дека Скопје повеќе нема време за изговори и експерименти.

„Скопје нема време за изговори, нема време за експерименти. Му треба докажана работа. Ќе работиме со љубов и ќе гледаме на предизвиците како на решенија и перспектива“, нагласи тој.

Ѓорѓиевски упати порака и до своите политички опоненти:

„Скопје нема време за театар, нема време за неуспешни обиди и нема време за втори шанси.“

Во своето обраќање, тој најави неколку клучни проекти што ќе ги реализира како иден градоначалник — од генерално чистење на градот до нови инфраструктурни решенија.

„Мојата прва акција ќе биде генералка на главниот град – масовна акција за чистење која ќе трае 72 часа. Веднаш потоа следува четиригодишната програма ‘Град без депонии’. Дивите депонии ќе станат минато“, рече Ѓорѓиевски.

Тој најави и изградба на нов резервоар и пумпна станица за стабилен притисок на водоводот во Ѓорче Петров.

„Граѓаните со години се соочуваат со слаб притисок на вода. Ќе обезбедиме стабилен систем кој ќе им служи и на генерациите што доаѓаат“, додаде тој.

На крајот од говорот, Ѓорѓиевски порача дека оваа изборна битка не е само за инфраструктура, туку и за иднината на Скопје.

„Ние не бегаме од проблемите – ние ќе ги решаваме. Ова е битка за душата на главниот град и за иднината на нашите деца, кои треба да растат во метропола со европски вредности и македонски печат“, заврши Ѓорѓиевски.

Скопје

ЦУК предупредува: „Ексклузивните“ објекти на Водно се под ризик од свлечишта

Скопје, 9 декември 2025 – Директорот на Центарот за управување со кризи (ЦУК), Стојанче Ангелов, алармира дека на падините на Водно се наоѓаат објекти кои се директно загрозени од свлечишта и нестабилно земјиште.

„Ризикот мора да се сфати сериозно – можно е да настрада човек ако не се реагира навреме“, рече Ангелов во гостување на ТВ Телма. Според него, делови од теренот веќе се нарушени, земјиштето продолжува да се лизга, а неколку потпорни ѕидови се урнати.

Ангелов посочи дека проблемот не е ограничен само на еден потег на падината и дека се неопходни брзи мерки, засилен мониторинг и процена на стабилноста на критичните зони. Институциите веќе работат на оваа проблематика, а во ЦУК се одржани неколку координативни средби на кои врвни професионалци активно се вклучени.

„Жителите на Водно често не ја сфаќаат целосната опасност бидејќи се навикнати на животот во тој предел. Но, видеа и искуства од целиот свет покажуваат дека свлечишта можат да предизвикаат сериозни штети и да загрозат човечки животи“, предупреди Ангелов.

Директорот на ДЗС нагласи дека медиумите имаат значајна улога во подигнувањето на јавната свест, особено кај луѓето кои живеат на Водно, за да се избегнат штетни последици пред да биде предоцна.

Зачестените извештаи за пукнатини на објекти и движење на земјиштето на Водно во последниот период дополнително ја зголемуваат загриженоста во јавноста.

Скопје

Скопје ја зацврстува врската со Дижон: Партнерството во полн развој

Градоначалникот на Град Скопје, Орце Ѓорѓиевски, денеска одржа работна средба со амбасадорот на Франција, Н.Е. Кристоф Ле Риголер, на која беа поставени темелите на визијата за нашиот главен град.

Ѓорѓиевски пред високиот гостин ја презентираше својата развојна стратегија за Скопје, базирана на најстрогите европски стандарди, зелени политики и продлабочена меѓународна соработка.

Главен фокус беше ставен и на оживување и унапредување на партнерството со збратимениот град Дижон. Двете страни интензивно разговараа за конкретни можности за нови заеднички проекти и иницијативи кои директно ќе го подобрат животот на граѓаните.

Градоначалникот Ѓорѓиевски беше јасен и недвосмислен:

„Нашиот стремеж е Скопје целосно да ги интегрира европските стандарди во секој сегмент – од економскиот развој и културата до зелените политики! Ова е патот кон модерна европска метропола!“

Амбасадорот Ле Риголер, пак, ја изрази целосната подготвеност на Франција да не остави Скопје да чека!

„Подготвени сме да го споделиме нашето богато искуство и иновативни иницијативи кои ќе дадат огромен придонес за подобрување на инфраструктурата и квалитетот на живот во Скопје!“

На крајот, двете страни се согласија дека континуираната институционална комуникација е важна за отворање на нови, долгорочни партнерства и мега-проекти. Ѓорѓиевски е убеден дека оваа соработка е голем чекор кон оформување на Скопје како современ европски град, ориентиран кон иновации и меѓународна отвореност.

Скопје

Неплатените даночни обврски во Скопје надминаа 36 милиони евра, локалната власт апелира до граѓаните за редовно плаќање

Град Скопје алармира дека вкупните неплатени обврски кон градот по основ на данок на имот, данок на промет, данок на наследство и подарок, како и комунална такса-фирмарина, за периодот од 2020 до 2025 година, надминале 36 милиони евра. Овие податоци се евидентирани од страна на Секторот за даноци на имот и комунални такси при Градот.

Од градската администрација потенцираат дека приходите од даноците на имот и комуналните такси претставуваат значаен извор на средства неопходни за непречено функционирање на Скопје. Со овие средства се финансираат: основните градски услуги, инфраструктурни проекти, трошоците на јавните претпријатија и јавните установи, работата на средните училишта.

Град Скопје упатува јавен повик до сите даночни и таксени обврзници – правни и физички лица – кои сѐ уште не ги подмириле своите обврски за данок на имот, промет, наследство и подарок, како и комунална такса-фирмарина, тоа да го сторат во најкраток можен рок.

Граѓаните и компаниите имаат можност електронски да ги проверат и платат своите долгови преку официјалната платформа: https://danoci.skopje.gov.mk/gskopje/root/public/login.xhtml

За сите прашања и информации, Градот ги објави следниве контакт податоци, организирани по категории:

Данок на имот: 072/204-434, 02/3207-546, e-mail: anitan@skopje.gov.mk ; nuredin.nuredin@skopje.gov.mk

Данок на промет, наследство и подарок: 02/3297-298, 02/3297-296, e-mail: biljanna.manakoska@skopje.gov.mk

Комунална такса-фирмарина: 02/3297-314, e-mail: angelina.gievska@skopje.gov.mk

Даночно сметководство: 02/3297-298, 02/3297-296, e-mail: katerina.donev@skopje.gov.mk

Даночниот долг може да се подмири и на Даночните шалтери на Град Скопје, кои работат секој работен ден од 8 до 19 часот, како и во сабота на 13 декември.