Министерката за енергетика, рударство и минерални суровини, Сања Божиновска, денес ги посети и поздрави учесниците на годишното стручно советување ПОДЕКС – ПОВЕКС 2025, што оваа година се одржува во Охрид под мотото „Рударството низ призмата на одржливиот развој“.
Во своето обраќање, министерката Божиновска истакна дека патот кон модерно и одржливо рударство започнува со знаење, иновации и визија, но и со заедничка посветеност на сите чинители во секторот.
„Споделувањето на идеи, искуства и најдобри практики е патот што нè води кон рударство кое ја почитува природата, ги штити граѓаните и создава долгорочна вредност за државата. Новите технологии денес овозможуваат почиста, побезбедна и поефикасна експлоатација на ресурси, но вистинската одржливост започнува со луѓето – со едукација, поддршка на младите и вложување во нови генерации подготвени за иднината,“ нагласи Божиновска.
Таа потенцира дека одржливото рударство не е само технолошки предизвик, туку процес кој бара знаење, одговорно управување и целосна транспарентност.
„Нашата заедничка одговорност е да создадеме сектор кој ќе биде двигател на економијата и истовремено чувар на природата,“ додаде министерката Божиновска.
Советувањето ПОДЕКС – ПОВЕКС 2025 ги обединува водечките експерти, компании и институции од областа на рударството и енергетиката, со цел размена на искуства и промовирање на одржливи практики кои ќе ја насочат индустријата кон еколошка и технолошка трансформација.
