Според извештаите на израелските медиуми, меѓу кои јавниот сервис „Кан“ и военото радио, израелската армија (ЦАХАЛ) добила наредба да ги прекине сите воени операции во Појасот Газа и околните подрачја.
Како што наведуваат извори од израелскиот воен врв, одлуката е донесена откако американскиот претседател Доналд Трамп преку видео-обраќање го повика Израел да ги запре нападите, тврдејќи дека Хамас го прифатил неговиот мировен предлог за прекин на конфликтот.
Военото радио пренесува дека новата наредба предвидува значително намалување на борбените активности, со дозвола исклучиво за „одбранбени маневри“ на единиците кои веќе се распоредени на терен. Наводно, одлуката уследила по ноќните разговори меѓу израелски и американски официјални претставници.
Истовремено, јавниот сервис „Кан“ објави дека преговорите за мировната иницијатива на Трамп би требало да започнат наскоро.
Трамп во својата порака нагласи дека планот сè уште не е целосно дефиниран, но според соопштението на Хамас, постои изразена подготвеност за „траен мир“.
„Израел мора веднаш да го запре бомбардирањето на Газа за да можеме безбедно и брзо да ги ослободиме заложниците. Во моментов е премногу ризично тоа да се прави. Работиме на деталите. Ова не е само прашање на Газа, туку и на траен мир на Блискиот Исток“, порача Трамп.
