На дебатата со актуелниот градоначалник и кандидат за трет мандат, Драган Анастасов – Ладич од СДСМ, кандидатот за градоначалник на Општина Пробиштип од ВМРО-ДПМНЕ, Тони Тоневски, ја истакна потребата од враќање на економскиот развој како главен приоритет.
„Пробиштип беше една од најразвиените општини во поранешна Југославија,“ истакна Тоневски, одговарајќи на прашањето како е можно градот денес да се соочува со толкава нефункционалност. „Економскиот развој во последните осум години стагнира, односно Анастасов како градоначалник многу малку финансираше во делот на економски развој. Немаше ниту урбанизација, ниту индустриски зони, ниту тоа што се бара на пазарот – инвестирање во планска документација, инфраструктура на тие зони, барање нови инвеститори, за да се отвораат работни места. Со тоа ќе се враќаа и сите тие што работат и во Штип и во Кочани во индустриските зони.“
Тоневски нагласи дека токму економскиот развој мора да биде основата на сите идни политики. „Ние можеме да инвестираме колку сакаме и во паркови и во игралишта и во детски катчиња и во зеленило, но доколку нема деца и млади, доколку нема луѓе кои се задоволни од својата работа, плати и примања, остануваат да живеат во Пробиштип, инвестираат – сето тоа друго ќе биде за џабе потрошено,“ порача тој.
Во текот на дебатата, Тоневски потсети и на дел од проектите реализирани во неговиот мандат, меѓу кои индустриските зони во урбан блок 12-1, каде се изградени десетици погони, како и индустриската зона кај „Кранфилд Фаундри“.
И двајцата кандидати – актуелниот градоначалник Драган Анастасов и неговиот противкандидат Тони Тоневски – на изборите на 19 октомври ја бараат поддршката од граѓаните за нивниот трет мандат.
