Во загреана атмосфера, кандидатите за градоначалници на Општина Пробиштип, Тони Тоневски од ВМРО-ДПМНЕ и актуелниот градоначалник Драган Анастасов – Ладич од СДСМ, влегоа во препукувања и дијаметрално различни ставови околу платите и условите на рударите.
Анастасов му префрли на својот противкандидат дека тој и неговата влада треба да внимаваат „да не се затвори рудникот“, дека „платите на рударите се намалени за 35%“ и се осврна на критиките што Тоневски ги упатуваше кон поранешното раководство на рудникот.
На тоа, Тоневски возврати: „Платата на рударите ниту еден денар не е намалена. Зголемена е на сите оние кои работат во рударството.“ Тој дополни дека, иако платите во администрацијата можеби не се зголемени, тие не се ниту намалени.
Тоневски ја потенцираше и својата лична поврзаност и експертиза со рударстово: „Моето прво вработување е во рудникот. Дедо ми беше рудар, татко ми беше рудар, чичко ми беше рудар. Јас го сакам рудникот повеќе од сите и знам дека општината не може да функционира без рудникот.“
