Република

ВМРО-ДПМНЕ Пробиштип: СДС го користи општинскиот буџет како партиски банкомат

Општинскиот комитет на ВМРО-ДПМНЕ Пробиштип обвини дека владејачката СДС ја користи општинската каса за финансирање на свои партиски кадри преку здруженија.

Во соопштението се наведува дека од буџетот се издвоиле 167.000 денари за здружението „ТЕРА САПИЕНТИА“ од Злетово, чиј основач е актуелниот советник и кандидат за советник на СДС, Дарко Кузев, а претседател е Марјан Ѓичев, исто така кандидат на листата на СДС за претстојните локални избори.

„Станува збор за здружение формирано и раководено директно од советници на СДС – а токму тие добиваат пари од истиот тој буџет кој треба да им служи на сите граѓани. Ова е класична злоупотреба и параван преку кој партијата си полни џебови со јавни пари,“ стои во соопштението.

Од ВМРО-ДПМНЕ Пробиштип прашуваат дали ваквите организации се навистина невладини или претставуваат алатка за партиско финансирање и предупредуваат дека општинските средства се претвораат во партиски фондови на СДС.

„Особено е загрижувачко што лица кои треба да ја претставуваат независноста на Советот, денес ги користат функциите за партиска корист. Наместо отчетност и транспарентност, гледаме лични и партиски интереси,“ порачуваат од опозициската партија.

ВМРО-ДПМНЕ најавува дека ќе ги извести сите надлежни институции за да се испита случајот и да се утврди дали постојат елементи на злоупотреба, судир на интереси или криминал.

„На граѓаните им должиме отчетност, а на оние што го гледаат буџетот како сопствена каса – одговорност,“ порачуваат од ВМРО-ДПМНЕ Пробиштип.

Република

Плакат од Киро Урдин во рацете на Коњановски како симбол на поддршката за „Браќа Манаки“

Директорот на Интернационалниот фестивал на филмската камера „Браќа Манаки“, Димитрија Доксевски, и извршниот директор Роберт Јазаџиски остварија средба со градоначалникот на Битола, Тони Коњановски, на која беше потврдена силната соработка меѓу фестивалот и Општина Битола.

На средбата се разговараше за долгогодишната партнерска врска која градот домаќин ја има со најстариот фестивал за филмска камера во светот, како и за подготовките за 47-то издание, чија цел е уште повпечатлива организација и достоинствен прием на меѓународните гости.

Како израз на благодарност, Доксевски и Јазаџиски на градоначалникот му врачија плакета со мотив од официјалниот плакат на 46-тото фестивалско издание, чиј автор е светски признатиот македонски сликар Киро Урдин.

Република

Проданоски оствари средба со британскиот амбасадор Лосон во Прилеп

Градоначалникот на Општина Прилеп, Дејан Проданоски, денеска оствари значајна протоколарна средба со амбасадорот на Обединетото Кралство во Македонија, Н.Е. Метју Лосон. На состанокот присуствуваа и претседателката на Советот на Општина Прилеп, како и пратениците од Прилеп во Собранието на Република Македонија.

Проданоски пред амбасадорот ја претстави моменталната состојба во општината, локалните потенцијали, унапредената бизнис клима, тековните и идните инфраструктурни инвестиции, како и поволностите што ги нуди Општина Прилеп за идните инвеститори. Тој нагласи дека Прилеп отсекогаш се гордее со својата традиција, вредности и квалитетот што може да го понуди на Европа.

Амбасадорот Лосон ја презентираше работата на Британската бизнис асоцијација, истакнувајќи ја јасната определба за зајакнување на деловните врски и подобра поврзаност меѓу компаниите – можност што отвора пат за нови инвестиции во регионот.

На средбата беше отворена и темата за Договорот за стратешко партнерство меѓу двете влади, чија реализација вклучува капитални проекти од огромно значење, меѓу кои и изградбата на хидроелектраните Чебрен и Галиште. Овие инвестиции се очекува да донесат силен развоен импулс за Прилеп и поширокиот регион.

Проданоски порача дека општината продолжува да ги продлабочува билатералните односи и да работи на подобрување на условите за живот, развој и економски напредок на сите граѓани.

Република

Овие места утре во Тетово и тетовско ќе бидат без струја

ЕВН Македонија најави планирани прекини во напојувањето со електрична енергија за утре, 11 декември 2025 година, на неколку локации во Тетово и тетовскиот регион. Прекините ќе траат од 09:00 до 14:00 часот, а ќе бидат опфатени следните места:

Село Одри – делови од населеното место ќе останат без електрична енергија поради планирани технички зафати.
Тетово – дел од подрачјето на Попова Шапка, конкретно објектите што се наоѓаат во близина на одморалиштата на ЕВН.
Село Одри (македонско маало) – објекти лоцирани во овој дел повторно ќе бидат засегнати од прекинот.

Од компанијата информираат дека прекините се дел од редовните технички активности за подобрување на мрежата, а по завршувањето се очекува стабилизирано и подобрено снабдување.

Граѓаните се повикуваат навреме да ги планираат своите обврски и да преземат соодветни мерки додека трае прекинот во напојувањето.