Најмалку пет лица загинаа во масовен руски напад врз Украина во текот на изминатата ноќ, во кој биле испукани повеќе од 50 ракети и речиси 500 беспилотни летала, соопшти украинскиот претседател Володимир Зеленски.
Според агенцијата Ројтерс, нападите предизвикале сериозни оштетувања на инфраструктурата во повеќе региони низ земјата. Најтешко погоден бил Лавов, град во западна Украина близу границата со Полска, каде што загинале четири лица, а бил запален и индустриски парк. Дел од градот останал без електрична енергија.
Градоначалникот на Лавов, Андриј Садови, ги повика граѓаните да останат во своите домови додека службите за итни интервенции се справуваат со повеќе пожари.
Во Запорожје, едно лице загинало, а деветмина се повредени во комбиниран ракетен и дрон-напад што оставил повеќе од 73.000 домаќинства без струја, информираше гувернерот Иван Федоров.
Украинската премиерка Јулија Свириденко изјави дека цивилна инфраструктура е оштетена и во регионите Ивано-Франкивск, Виница, Чернигов, Херсон, Харков и Одеса, нарекувајќи ги нападите „уште еден чин на терор против цивили“.
„Москва продолжува да уништува домови, училишта и енергетски објекти – уништувањето останува нејзина единствена стратегија“, напиша Свириденко на платформата X.
Зеленски истакна дека Украина има потреба од поголема воздушна заштита и побара побрзо спроведување на меѓународните одбранбени договори.
„Ни треба вистинска заштита на небото. Само така може да се отвори патот кон вистинска дипломатија. Америка и Европа мора да дејствуваат за да го натераат Путин да престане“, порача украинскиот претседател.
Русија сè уште нема издадено официјален коментар за нападите, но според украинските власти, Москва во последните недели значително ги зголемила ударите врз енергетската мрежа, додека се приближува четвртата зима од почетокот на војната.
Во меѓувреме, Полска, членка на НАТО, соопшти дека ги покренала своите воени авиони за зајакнување на воздушната безбедност поради близината на нападите.
„Полските и сојузничките авиони се активни во нашиот воздушен простор, а системите за воздушна одбрана и радарско извидување се во највисока состојба на подготвеност,“ објави полската оперативна команда.
Истовремено, неколку европски земји, меѓу кои Данска, Германија и Литванија, пријавија зголемени инциденти со беспилотни летала во нивниот воздушен простор. Аеродромот во Вилнус беше привремено затворен во текот на ноќта поради детектирани балони што се движеле кон градот.
