Американскиот претседател Доналд Трамп денеска потпиша извршна наредба со која овласти испраќање на 300 припадници на Националната гарда во Чикаго, Илиноис. Одлуката следи по привремената судска блокада на слична мерка за распоредување на Гарда во Портланд, Орегон.
„Претседателот Трамп овласти 300 гардисти да ги заштитат федералните агенти и имотот во Чикаго“, соопшти неговата портпаролка Абигејл Џексон, нагласувајќи дека Трамп „нема да дозволи анархија во американските градови“.
Мерката предизвика остри реакции кај демократите. Сенаторот Дик Дарбин од Илиноис ја оцени како „неоправдана и мотивирана од политички причини“, додавајќи дека „Трамп не се бори против криминалот, туку шири страв“.
Чикаго е петтиот град под демократска власт во кој претседателот нареди распоредување на Националната гарда. Претходно гардисти беа испратени во Лос Анџелес, Вашингтон и Мемфис, и покрај противењето на локалните власти.
Слична операција во Портланд беше стопирана со одлука на федералната судијка Карин Џ. Имергут, која оцени дека протестите таму не претставуваат „опасност од бунт“ и можат да се контролираат преку редовните полициски сили. Одлуката важи до 18 октомври.
Заменик-шефот на кабинетот на Трамп, Стивен Милер, на платформата X ја нарече судската одлука „бунт против федералната власт“ и ги обвини лидерите на Орегон за „организиран напад врз државата“.
Откако се врати во Белата куќа во јануари, Трамп ја постави борбата против нелегалната имиграција и реставрацијата на редот во градовите под контрола на демократите како клучен приоритет на својот втор мандат.
