Во Непал се води вистинска борба со природна катастрофа — поројните дождови и силните поплави однеле повеќе од 20 животи, а за десетици лица сè уште се трага, соопштија локалните власти.
Во последните 36 часа, најмалку 22 лица загинале, од кои 18 во одделни свлечишта во источниот округ Илам, кој се граничи со Индија. Три лица починале од удари на гром, а уште едно лице загинало во поплавите во округот Удајапур.
Според Националното тело за управување со ризици од катастрофи (NDRRMA), единаесет лица се водат како исчезнати, а спасувачките тимови интензивно ги пребаруваат погодените подрачја.
Поројните дождови предизвикаа блокада на главните автопати и уривање на мостови, оставајќи стотици патници заглавени. Иако домашните летови се нарушени, меѓународниот сообраќај во Катманду се одвива нормално, потврдија од аеродромот.
Во југоисточниот дел на земјата, реката Коши се искачи над опасното ниво, а властите отворија сите 56 брани за да го олеснат протокот на водата.
Монсунските дождови, кои обично траат од јуни до септември, секој година предизвикуваат десетици човечки жртви во планинскиот Непал. Метеоролозите предупредуваат дека врнежите ќе продолжат и во понеделник, а властите преземаат мерки за заштита и евакуација на населението од најризичните области.
