Според првата глобална проценка на Светската здравствена организација (СЗО), најмалку 15 милиони тинејџери на возраст од 13 до 15 години користат е-цигари, а младите „вејпаат“ девет пати почесто од возрасните во земјите каде што постојат релевантни статистички податоци.
Во светот денес повеќе од 100 милиони луѓе користат е-цигари, од кои најмалку 86 милиони се возрасни, претежно во земји со висок приход. Податоците се објавени во време кога глобалната употреба на тутун продолжува да опаѓа – бројот на корисници на тутун паднал на 1,2 милијарди во 2024 година, од 1,38 милијарди во 2000 година.
Етиен Круг, директор на одделот на СЗО за здравствени детерминанти, истакнува дека е-цигарите создаваат „нов бран на зависност од никотин“. „Овие производи се презентираат како ‘помала штета’, но всушност децата порано се навикнуваат на никотин, што го загрозува долгорочниот напредок во јавното здравје“, предупредува Круг.
Иако некои студии покажуваат дека е-цигарите можат да помогнат на возрасните пушачи да се откажат од тутунот, недостасуваат доволно податоци за долгогодишните ефекти врз здравјето.
СЗО исто така предупредува дека речиси секоја петта возрасна личност во светот и понатаму користи тутунски производи, со највисока застапеност во Европа (24,1% пушачи), при што европските жени се рекордерки со 17,4% користење на тутунски производи. Организацијата повикува на построга примена на мерки за контрола на тутунот и регулација на новите никотински производи, вклучително и е-цигарите.
