Министерката за енергетика, рударство и минерални суровини, Сања Божиновска, денеска се сретна со Ана Дуковска, претседателка и ко-основачка на здружението „Јас сум Жена“, и со Валентина Дисоска, претседателка на Асоцијацијата на бизнис жени.
Средбата беше посветена на иницијативи за поголема застапеност на жените во енергетиката и во бизнис секторот, со фокус на градење професионални мрежи, менторство и видливост на женските лидерски потенцијали.
„Во Министерството ја поддржуваме секоја иницијатива која им дава простор и глас на жените во енергетиката. Овој сектор бара визија, знаење и храброст – а токму тоа жените го имаат. Време е нивната експертиза и лидерски потенцијал да бидат видливи и во енергетиката. Ние не бараме квоти, туку квалитет“, изјави Божиновска.
Дисоска додаде дека активната поддршка од институциите е клучна за овозможување на жените да се искачат на позиции на одлука, додека Дуковска порача дека здружувањето и соработката меѓу жените е клуч за создавање поколение лидери кои ќе дејствуваат, а не ќе прашуваат дали можат.
Средбата заврши со договор за натамошна соработка во рамки на конкретни програми и настани, со цел да се зголеми улогата и видливоста на жените во енергетиката, иновациите и бизнис заедницата.
