Министерот за внатрешни работи Панче Тошковски преку објава на својот Фејсбук профил остро реагираше на, како што рече, најновиот бран неосновани и политички мотивирани напади од страна на СДСМ. Според него, зад нападите стои обид да се прикрие очајот и стравот од одговорност за осумгодишното уништување на системот и институциите.
„Истите оние кои со години ја рушеа државата, денес се обидуваат да ја избришат сопствената одговорност со папагалско повторување на зборот ‘оставка’, без ниту еден аргумент“, напиша Тошковски.
Тој истакна дека повеќе од една година, СДСМ секојдневно повторува барања за негова оставка, без оглед на темата. „Еден ден тоа е безбедноста, друг ден животната средина, третиот парното во зграда. Не би се изненадил ако утре ме обвинам и за недостиг на сонце во Скопје“, порача министерот, оценувајќи дека партијата со тоа само го потврдува своето политичко очајување.
Тошковски нагласи дека нападите врз него се резултат на фактот што институциите конечно работат независно, а правдата, како што рече, „им тропа на врата на оние кои со години беа недопирливи“.
„Толку ли им пречи што расчистивме 14 криминални банди, што поднесовме кривични пријави против поранешни функционери и директори, и што МВР конечно не е алатка за партиски и бизнис интереси?“, праша Тошковски, додавајќи дека не планира да поднесе оставка.
Министерот потсети дека е првиот во историјата кој преживеал две интерпелации во рок од една година – една од Левица и една од ДУИ – и дека, како што рече, единствено недостасува СДСМ да поднесе трета за да се заокружи „необичната коалиција на очајот“.
„Јас нема да си поднесам оставка. Додека тие се занимаваат со спинови и конструкции, јас ќе продолжам да решавам проблеми и да расчистувам со нередот што го оставија“, порача Тошковски, додавајќи дека на претстојните локални избори граѓаните ќе покажат која страна работела, а која ширела паника и хистерија.
