Американскиот претседател Доналд Трамп донесе одлука да ги прекине сите дипломатски напори кон Венецуела и му наложи на својот специјален пратеник Ричард Гренел да ги суспендира сите контакти, потврди висок американски функционер во понеделникот.
Веста прв ја објави „Њујорк тајмс“, а таа доаѓа во момент кога САД изведоа серија воздушни напади врз пловила за кои се сомнева дека пренесуваат дрога во близина на венецуелската територија. Трамп му порача на Конгресот дека САД се „во не-меѓународен вооружен конфликт“ со нарко-картелите.
Според информации на „Ројтерс“, Трамп разгледува и можност за воени удари во самата Венецуела, но засега не е донесена конечна одлука за втора фаза од кампањата.
Трамп минатиот четврток му ја пренел наредбата на Гренел за време на состанок во Овалната сала со високи воени претставници, откри извор од Белата куќа.
Во неделата, Трамп им се обрати на американските војници изјавувајќи дека нападите врз бродовите во близина на Венецуела „го сопреа морскиот шверц со дрога“, додавајќи дека сега ќе се „фокусираат на копното“. Повеќе детали од Белата куќа не беа објавени.
Тензиите меѓу Вашингтон и Каракас дополнително се зголемија откако Трамп се врати во Белата куќа во јануари. Венецуелскиот претседател Николас Мадуро ги отфрла американските обвинувања дека во земјата се произведува дрога, тврдејќи дека вистинската цел на САД е негова смена од власт.
Иако Трамп во јавноста ја ублажи реториката околу промена на режимот во Венецуела, во август американската влада ја зголеми наградата за информации што би довеле до апсењето на Мадуро — сега изнесува 50 милиони долари.
Вашингтон го обвинува Мадуро за врски со меѓународни нарко-картели и криминални групи, што венецуелскиот претседател категорично го негира.
