Основното јавно обвинителство Скопје, во координација со Министерството за внатрешни работи, спроведе акција по добиени сознанија за можен нечовечен третман кон штитеници во две приватни установи за згрижување на стари лица во главниот град.
Во акцијата, освен Обвинителството и МВР, биле вклучени и инспектори од Министерството за социјална политика, Државниот санитарен и здравствен инспекторат, Државниот инспекторат за труд, како и Агенцијата за храна и ветеринарство. На терен биле присутни и екипи од Итната медицинска помош, Центрите за јавно здравје и Институтот за судска медицина и криминалистика.
Според Обвинителството, досега се лишени од слобода две лица, а претреси биле извршени на вкупно шест локации поврзани со двете установи. Претресите почнале вчера, а денеска продолжиле на уште две нови адреси.
„Во тек се анализи на прибраните материјални докази и изјави. Институциите ќе продолжат со активностите за целосно утврдување на фактите и евентуалната одговорност во случајот“, соопштија од Обвинителството, додавајќи дека јавноста ќе биде навремено информирана за сите понатамошни детали.
