Царинската управа соопшти дека при контрола на стока пријавена за транзит на граничниот премин Богородица биле запленети 1.158 часовници со ознаки на познати трговски марки како „Ролекс“, „Бос“, „Армани“ и „Томи Хилфигер“.
Случајот го открил мобилен царински тим кој, поради сомневање, извршил детален преглед на пратката. Според приложената фактура издадена од фирма од Кина, вредноста на стоката изнесувала 60.852 денари. Поради сомнение за повреда на права од интелектуална сопственост, часовниците се задржани и е започната постапка за утврдување на нивната оригиналност.
Од почетокот на годинава, царинските службеници откриле вкупно 63 случаи на повреда на права од интелектуална сопственост, при што биле запленети речиси 78.000 производи со ознаки на познати брендови. Во 37 случаи веќе е потврдено дека се работи за фалсификати – вкупно 27.329 производи.
„Овие резултати се потврда на континуираната заложба на Царинската управа во спречувањето на трговијата со фалсификувани производи“, изјави директорот на Царинската управа, Бобан Николовски.
