Украинските вооружени сили успеале да го забават руското напредување во централниот дел на Донбас, но успехот е постигнат по висока цена. Дел од украинските единици биле префрлени од други боишта за да ја зајакнат одбраната, што оставило повеќе сектори на фронтот ранливи на нови руски продори, пренесува независниот руски портал Meduza.
Висока цена за одбраната на Донбас
Украина во август била принудена да пренасочи значителни воени сили од други подрачја за да го спречи руското пробивање меѓу Покровск и Костјантивка. Оваа концентрација на трупи резултирала со слабеење на одбраната во други региони. Руски сили во меѓувреме напредувале кон Славјанск долж двете страни на реката Сиверски Донец, освојувајќи ја шумата Креминска — подрачје кое Украина го контролираше од есента 2022 година.
Руски пробив кај Добропоље
Почетокот на август го обележал најголемиот руски продор во централниот Донбас. Единици од 51-та армија напредувале околу 20 километри во длабочина на украинската одбрана, стигнувајќи до патот Добропоље–Краматорск. Украина реагирала со испраќање резерви од други фронтови и успеала делумно да ги потисне руските сили, но без целосно затворање на пробојот.
Русија, пак, испратила нови појачувања, меѓу кои и бригади на морнаричка пешадија, што ѝ овозможило да ги стабилизира своите позиции. Иако Киев тврди дека повторно зазел неколку населени места, за тоа нема визуелни докази.
Нови закани по Славјанск и Лиман
На север, руските сили по повеќегодишни борби ја презеле контролата врз шумата Креминска и напредувале кон реката Сиверски Донец, што ја загрозува украинската контрола врз градот Сиверск. Лиман, пак, е речиси целосно опколен, со ограничени можности за снабдување, бидејќи мостовите се уништени, а импровизираните премини се под постојани руски воздушни напади.
Напредување без отпор во Днипропетровска област
Руски единици, засилени со тенкови и пешадија, напредуваат и во областите меѓу Днипропетровск, Донецк и Запорожје, каде се обидуваат да ја пресечат клучната патна врска меѓу градовите Хуљајполе и Покровск. Поради недостиг од трупи, украинската одбрана на овој сектор е принудена на мобилна тактика со локални контранапади.
Притисок врз Запорожје
Во Запорожката област, руските сили продолжуваат со офанзива кон градот Орехов и напредуваат долж исушената област околу некогашното езеро Каховка. Последните извештаи укажуваат дека Русите презеле контрола над неколку населени места, вклучително и Приморске.
Доколку руските сили стигнат до реката Конка, тие би можеле директно да ги гаѓаат целите во самиот град Запорожје, што би претставувало нова сериозна закана за украинските позиции на југоистокот на земјата.
