Кандидатот за градоначалник на Општина Битола, Тони Коњановски, ги презентираше трите главни приоритети од својот план: изградба на нова противпожарна станица, пакет сообраќајни интервенции на критични точки и целосна реформа на јавниот градски превоз.
Во делот на безбедноста, Коњановски најави нова противпожарна станица со современа опрема и подобрена логистика.
„Безбедноста е предуслов за развој. Со новата станица обезбедуваме побрза интервенција и подобра заштита на луѓето и имотот,“ изјави тој, најавувајќи јавно објавени рокови и буџетска рамка за реализација.
Како втор приоритет, кандидатот го издвои пакетот сообраќајни мерки, кој опфаќа реконструкција на главните пристапи кон градот, уредување раскрсници со зголемена фреквенција, подобрена сигнализација и побезбедни рути за пешаци и велосипедисти.
„Ги решаваме тесните грла и небезбедните точки. Целта е побрз проток, помалку метеж и повеќе безбедност за сите учесници во сообраќајот,“ рече Коњановски.
Третиот столб како што напомена Коњановски е реформа на јавниот превоз. Планот предвидува оптимизација на линиите, обновување и набавка на возила со пониски емисии и дигитални услуги,електронска наплата и мобилна апликација за следење рути во реално време.
„Јавниот превоз мора да биде предвидлив и удобен.Автобусите да пристигнуваат навреме, линиите да ги покриваат сите квартови, а билетот да се купува за неколку секунди со телефон“. Предвидено е и уредување на постојки со осветлување, информативни табли и подобрена пристапност за лица со попреченост. Со новиот возен ред и дигитални алатки, граѓаните точно ќе знаат кога пристигнува автобусот,“ додаде Коњановски.
Коњановски додаде дека реализацијата ќе се спроведува транспарентно, со редовни извештаи за напредок и консултации со стручната јавност и локалната заедница.
„Ова се проекти со мерливи резултати. Посигурен град, пофункционален сообраќај и достоен јавен превоз. Битола ќе ја почувствува разликата,“ порача Коњановски.
