Скопје

Меџити најави 40 милиони евра инвестиции во нови училишта и градинки во Чаир

Кандидатот за градоначалник на Општина Чаир, Изет Меџити, го претстави планот за најголемиот инвестициски циклус во областа на образованието досега, со јасна цел – секое дете да има пристап до квалитетно образование, современи училишта и безбедни услови за развој на својот потенцијал.

„Образованието е темелот врз кој се гради едно општество. Нашата визија е Чаир да стане општина на знаењето, еднаквите шанси и модерните училишта,“ изјави Меџити.

Планот предвидува изградба на три нови детски градинки, нова училишна зграда за 1.300 ученици во Тенеќе Маало, нова специјализирана школа за деца со посебни потреби „Иднина“, како и проширување на училиштата „Хасан Приштина“ и „Исмаил Ќемали“. Дополнително, ќе се изгради и современа спортска сала во училиштето „Јашар беј Скопје“.

Меџити најави и целосна модернизација на сите училишта – наставата ќе се одвива во една смена, со обновени училишни дворови и сали, нова ИТ опрема во секоја училница и целосна пристапност за децата со попреченост.

Во рамки на програмата се предвидени и стипендии за талентирани ученици, бесплатни учебници и училишен прибор за првачињата, како и обуки во технологија и развој на училишниот спорт.

Централна точка на визијата на Меџити е универзитетскиот кампус „Маjка Тереза“, инвестиција вредна 40 милиони евра, која треба да го трансформира Чаир во вистински академски и развоен центар.

„Средствата за сите овие проекти се обезбедени. Време е да ги реализираме и да го направиме образованието најсилниот столб на развојот во Чаир,“ порача Меџити.

Скопје

Николоски: Карпош добива нов урбан лик со реконструкција на над 15 улици

Преку петнаесетина улици ќе се реконструираат во општина Карпош со подршка на Владата. Општината полека ќе го смени урбаниот лик и ќе се развива, истакна вицепремиерот и министер за транспорт Александар Николоски при денешната посета на општина Карпош.

Николоски заедно со градоначалникот Сотир Лукровски извршија увид во реконструкција на ул. Јуриј Гагарин, проект кој се реализира со подршка на Министерството за транспорт, а во заедничка соработка со општината.

“ Ова беше заглавен проект, ова беше проект без разлика што имавме обезбедено средства, не можевме да го реализираме. Откако беше избран за градоначалник, заедно со службите во општината, успееја да ги решат сите предизвици на овој проект, да се решат проблемите и еве веќе се гради и ако се оди добро и не послужи времето до Нова година може да се заврши оваа улица, паркингот зад зградите и да се добие нов урбан лик на овој простор. Сакам да најавам дека дополнително на ова имаме уште еден проект кој се реализира со Светска банка во вредност од над 13 милиони денари, тоа е улицата Петар Чаулев, целосна реконструкција околу 600 метри што дополнително се надевам ќе допринесе за урбаниот развој на општината. На тоа додаваме уште дванаесетина проекти кои што ги резлизираме преку вториот повик на Владата и севкупно имаме значајни проекти за општина Карпош. Тука е и подршката на Владата, мојата лична подршка за дополнителни работи кои треба да ги направиме во Карпош. Со изборот на новиот градоначалник, со неговата напорна работа се гледаат промените и навистина сите имаме желба да помогнеме и да се случуваат убави работи во општина Карпош”-изјави вицепремиерот Николоски.

Скопје

Прекин на електрична енергија денеска во Горно Нерези, Глуво и Мирковци

Регионалниот центар за управување со кризи (РЦУК) информира, повикувајќи се на известување од ЕВН Македонија, дека денес од 9:00 до 15:00 часот ќе има прекин во снабдувањето со електрична енергија за корисниците од неколку населени места.

Прекинот ги опфаќа корисниците од селото Горно Нерези и корисниците од селата Глуво и Мирковци.

Станува збор за планиран прекин, а корисниците се повикуваат на трпение до завршувањето на работите.

Скопје

Жителите на одредени делови од Аеродром денес без вода

Јавното претпријатие „Водовод и канализација“ – Скопје информираше за привремен прекин во водоснабдувањето за дел од корисниците лоцирани на булеварот „АСНОМ“, во населбата Аеродром.

Прекинот, кој започна вечерва во 18:45 часот, е предизвикан од уличен водоводен дефект на цевка со дијаметар Ф100 мм, конкретно кај број 74 на булеварот.

Погодени корисници ќе бидат корисниците лоцирани на булевар „АСНОМ“ од број 70 до број 116.

Екипите на ЈП „Водовод и канализација“ се на терен и работат на отстранување на дефектот. Водоснабдувањето ќе биде нормализирано веднаш по завршувањето на работните активности, за што јавноста ќе биде дополнително известена.