Париз – Лидерката на француската крајно десничарска партија Национален собир, Марин Ле Пен, денеска предупреди дека нејзината партија ќе ја блокира секоја нова влада и повторно го повика претседателот Емануел Макрон да го распушти Парламентот или да поднесе оставка.
„Ќе цензурирам сè. Престанете сега. Шегите траеја доволно долго“, изјави Ле Пен, додавајќи дека „величината, честа и моралот би го оправдале Емануел Макрон многу сериозно да размислува за распуштање на Парламентот или дури и за оставка“.
Оваа изјава доаѓа по оставката на францускиот премиер Себастијан Лекорну, кој ја поднесе функцијата пред два дена, само еден ден откако го објави составот на својата нова влада, а помалку од еден месец откако беше назначен. Тој е третиот премиер за една година, што го турна Франција во период на политичка неизвесност.
По оставката на Лекорну, на претседателот Макрон му останува да одлучи дали ќе именува нов премиер или ќе го распушти парламентот.
