На воениот полигон Пасуљанске Ливаде се одржа заедничката воена вежба „Соседи 25“, во организација на армиите на Србија и Унгарија, со цел унапредување на меѓусебната соработка и размена на оперативни и борбени искуства, соопшти српското Министерство за одбрана.
Во вежбата учествуваа припадници на Првата бригада на Војската на Србија и 30-та механизирана бригада на Унгарија. Војниците изведуваа заеднички тактички операции, користејќи современи борбени возила, комуникациски системи и опрема за разузнавачки активности. Ова е десетта по ред вежба од серијата „Соседи“, која претставува континуиран модел на регионална воена соработка.
Главната цел, како што наведуваат двете министерства за одбрана, е зајакнување на билатералните односи и унапредување на способностите на армиите за меѓународни операции и мировни мисии.
Вежбата е дел од поширокиот процес на стратешка одбранбена соработка меѓу Белград и Будимпешта, формализирана со договор потпишан во април 2025 година. Документот предвидува заеднички обуки, размена на воени ресурси и координација при набавка на современа опрема и оружје.
Паралелно, унгарската армија во октомври ја реализираше и меѓународната вежба „Адаптивни хусари 2025“, во која единицата „Гроф Ференц Надасди“ комбинираше традиционално коњаничко извидување со современи беспилотни летала, демонстрирајќи иновативен пристап во модерното војување.
