Министерката за енергетика, Сања Божиновска, денес соопшти дека над 45 концесии во рударството се раскинати, од кои 34 еднострано, а 11 договори истекле и не се продолжени.
„Причините за раскинување се непочитување на законските и еколошки обврски, неплаќање концесиски надоместоци, пренесување концесија без согласност и експлоатација надвор од дозволениот предел,“ рече Божиновска на брифингот со новинарите.
Министерката најави дека сите концесии ќе бидат јавно објавени и потенцира дека од почетокот на годинава до 1 октомври се спроведени 170 вонредни и 78 редовни инспекциски надзори.
Божиновска истакна дека ќе се воведат построги критериуми за издавање и контрола на концесиите, а во Државниот инспекторат за енергетика и рударство моментално работат 14 инспектори, но недостигаат уште најмалку толку за ефикасно спроведување на надзорот.
