Република

Куќен притвор наместо ефективен – Битолскиот суд не го прифати барањето на обвинителството за случајот „РЕК Битола“

Основниот суд во Битола одлучи да им одреди куќен притвор на двајца осомничени во истрагата за злоупотреби со јавни набавки во РЕК Битола, одбивајќи го предлогот на Основното јавно обвинителство за ефективен притвор.

Од Обвинителството веднаш реагираа на ваквата одлука, најавувајќи жалба до повисока инстанца. „Особено имајќи ги предвид ризиците од бегство на осомничените, од кои едниот поседува значителен имот во друга држава, сметаме дека куќниот притвор не е соодветна мерка“, соопштија од ОЈО Битола.

Истражниот предмет опфаќа осум физички и едно правно лице, меѓу кои и поранешниот директор на комбинатот и неколку раководители од Подружницата „Рудници“. Тие се сомничат дека во 2023 година сториле продолжено кривично дело „Злоупотреба на службена положба и овластување“ по член 353 од Кривичниот законик.

Според наодите на Управата за финансиска полиција, осомничените ги прекршиле правилата за економичност при јавна набавка за дислокација на погонски станици од рудникот „Осломеј“ во „Рудници“ – РЕК Битола. Тендерот, според обвинението, бил наместен за приватна компанија што станала единствен понудувач и склучила договор од кој прибавила противправна имотна корист од големи размери.

Дел од раководителите, заедно со службено лице, се товарат и за измама во службата, бидејќи потпишувале лажни извештаи за извршени работи кои воопшто не биле реализирани. На основа на тие документи, фирмата наплатила над 106 милиони денари со вклучен ДДВ.

Постапка е покрената и против сопственикот и управителот на фирмата, како и едно лице од компанијата, за злоупотреба на постапката за јавен повик и јавно-приватно партнерство.

Обвинителството најави дека истрагата продолжува со сослушување на сведоци и ангажирање на вештаци за потврдување на сомнежите за злоупотреби, фалсификувани извештаи и незаконски исплати.

Извор: skopje1

Република

ДЕЛ ОД ТЕТОВО И ШЕСТ СЕЛА УТРЕ БЕЗ СТРУЈА

Утре, 12 декември 2025 година, дел од Тетово и повеќе тетовски села ќе останат без електрична енергија поради најавени планирани прекини во снабдувањето.

Според објавата, без струја од 09:00 до 14:00 часот ќе бидат делови од градот Тетово, поточно објектите во близина на улицата Илинденска, кај стадионот.

Во истиот период, планиран прекин ќе има и во селата:
• Церово (повеќе локации, вклучително и репетитор Мобимак и целото село),
• Ново Село (две засегнати подрачја),
• Рогле,
• Теарце (од 09:00 до 10:00 часот),
• Челопек,
• Агино Село (ул. 114).

ЕВН најавува дека прекините се поради технички зафати во електро-мрежата и апелира граѓаните навреме да се прилагодат на измените.

Република

БИТОЛА БЛЕСНА ВО НОВА НОВОГОДИШНА СВЕТЛИНА

Битола и кажа добредојде на новогодишната магија. Претпразнично блеснаа улиците, плоштадите, сцените каде и годинава ќе се случува „Зимската приказна“.
Нова светлина, нова енергија, нова радост за граѓаните на Битола и сите гости.

Со оваа фотогалерија Ви пренесуваме дел од новогодишната магија во градот под Пелистер, подготвен за уште едно ново издание на предновогодишната програма на препознатливата „Зимска приказна“.

Република

Плакат од Киро Урдин во рацете на Коњановски како симбол на поддршката за „Браќа Манаки“

Директорот на Интернационалниот фестивал на филмската камера „Браќа Манаки“, Димитрија Доксевски, и извршниот директор Роберт Јазаџиски остварија средба со градоначалникот на Битола, Тони Коњановски, на која беше потврдена силната соработка меѓу фестивалот и Општина Битола.

На средбата се разговараше за долгогодишната партнерска врска која градот домаќин ја има со најстариот фестивал за филмска камера во светот, како и за подготовките за 47-то издание, чија цел е уште повпечатлива организација и достоинствен прием на меѓународните гости.

Како израз на благодарност, Доксевски и Јазаџиски на градоначалникот му врачија плакета со мотив од официјалниот плакат на 46-тото фестивалско издание, чиј автор е светски признатиот македонски сликар Киро Урдин.