Колумбискиот претседател Густаво Петро изјави дека бродот кој неодамна бил погоден со проектили од страна на американската војска бил колумбиски и дека во него имало колумбиски државјани. Белата куќа ги отфрли овие тврдења како „неосновани“.
Во последните недели, САД нападнале најмалку четири брода во водите на Карибите, при што загинале 21 лице. Американските власти тврдат дека акциите биле насочени против „криминални групи кои шверцуваат дрога“, но не понудија конкретни докази или детали за инцидентите, што предизвика осуда во повеќе држави од регионот поради можноста за кршење на меѓународното право.
Петро изјави дека „се отвора нов воен сценарио во Карибите“ и предупреди дека агресијата се насочува кон цела Латинска Америка.
„Се надевам дека семејствата на загинатите ќе се јават. Ова не е војна против шверцот, туку војна за нафта – и светот мора да ја запре“, изјави колумбискиот претседател.
Во меѓувреме, американскиот Сенат ја одби иницијативата со која ќе му се ограничи на претседателот Доналд Трамп употребата на воена сила против бродови во регионот. Предлогот го поднесоа демократите Адам Шиф и Тим Кајн, но беше одбиен со тесно мнозинство – 51 против 48 гласови.
Белата куќа реагираше со соопштение во кое наведе дека „очекува претседателот Петро јавно да ја повлече својата неоснована и навредлива изјава“, нагласувајќи дека САД и Колумбија и понатаму остануваат партнери во одржувањето на регионалната безбедност и стабилност.
Според документ кој неодамна протече во Конгресот, администрацијата на Трамп ги смета операциите во Карибите како дел од „немеѓународен вооружен конфликт“, што им овозможува поширока употреба на воени овластувања. Претседателот Трамп веќе ги означи повеќе нарко-картели во Мексико, Еквадор и Венецуела како терористички организации, што им овозможува на американските сили да делуваат поагресивно против нив.
