Неправилниот притисок во автомобилските гуми не само што ја зголемува потрошувачката на гориво, туку може да доведе и до опасни ситуации на патот. Според автоекспертите, редовното одржување на гумите е клучно за безбедноста, стабилноста и долговечноста на возилото – а разлика од само 0,5 бари може да направи огромна промена.
Пренискиот или превисокиот притисок влијае врз управувањето, стабилноста во свиоци, должината на кочење и рамномерното трошење на гумата. Во екстремни случаи, неправилниот притисок може да предизвика и пукање на гумата.
Каде се наведени препорачаните вредности
Оптималниот притисок зависи од типот на возилото и гумите (летни, зимски или целосносезонски). Производителот ги наведува препораките на неколку места:
• на налепницата од внатрешната страна на вратата на возачот,
• на внатрешната страна на капачето од резервоарот,
• во прирачникот за возачот.
При целосно натоварен автомобил, притисокот треба малку да се зголеми. За намалување на потрошувачката на гориво, може да се зголеми за 0,2 до 0,3 бари над препорачаното, но со тоа се намалува удобноста при возење.
Колку често да се проверува притисокот
Стручњаците препорачуваат проверка на секои две недели, но многу возачи го занемаруваат тоа. Иако современите автомобили имаат TPMS систем кој предупредува на пад на притисокот, рачната проверка е неопходна – особено ако се забележи промена во однесувањето на возилото или чудни звуци при возење. Дури и одстапување од 0,5 бари може да ја зголеми потрошувачката на гориво за околу 0,3 литри на 100 километри.
Како правилно се мери притисокот
Најлесно е да се направи на бензинска пумпа, каде што често е бесплатно. Важно е гумите да се проверуваат кога се ладни, да не се заборави резервната гума и да се направи контрола пред подолги патувања или сезонска промена на гумите. Топлиот воздух се шири и може да даде неточни резултати.
Последици од неправилен притисок:
• Пренизок притисок: возилото станува нестабилно, расте застанувањето при кочење и потрошувачката на гориво.
• Превисок притисок: гумата има помал контакт со патот, се троши нерамномерно и има пократок век.
• Оптимален притисок: подобра контрола, побезбедно возење и пониска потрошувачка на гориво.
Редовната проверка на гумите не е само прашање на економичност, туку и на безбедност – една минута на пумпата може да ви заштеди и пари, и проблеми.
