Владата на Република Македонија предложи измени на Законот за данок на додадена вредност (ДДВ), со кои се укинува ослободувањето од плаќање ДДВ за сите пратки од странство чија вредност не надминува 22 евра. Со оваа промена, онлајн нарачките што граѓаните ги прават преку меѓународни платформи како Тему, AliExpress или Shein ќе поскапат за 18 проценти — колку што изнесува актуелната стапка на ДДВ.
Според предложените измени, ослободување од ДДВ ќе остане само за пратки со некомерцијална вредност, испратени од физичко лице на физичко лице, доколку нивната вредност не надминува 22 евра. Исклучок од ова ќе бидат производи како алкохол, парфеми и тутун, за кои секогаш ќе се наплаќа данок.
Причината за измената, според Владата, е наглиот раст на онлајн купувањето и зголемените пратки од странство. Само во јуни 2025 година, македонските граѓани преку кинеската платформа Тему нарачале околу 250 тони стока. Од нив, околу 95 илјади килограми биле третирани како мали пратки ослободени од давачки, додека за останатите 150 илјади килограми биле наплатени 41,7 милиони денари во давачки.
Со измените, Владата има за цел да го усогласи домашното законодавство со европските практики и да обезбеди еднаков третман за сите производи што се увезуваат во земјата, без разлика на нивното потекло или вредност.
