Владата достави предлог до Собранието за измени на Законот за данокот на додадена вредност, со кој сите нарачки од странство под 22 евра ќе се оданочуваат со 18% ДДВ.
Претседателот на Трговската комора, Сашо Дукоски, ја оцени мерката како „вистински чекор кон фер конкурентска средина“.
„Сметаме дека досега домашните компании беа ставени во нерамноправна позиција бидејќи големите онлајн платформи продаваа производи без дополнителни давачки, што ја нарушуваше конкурентноста и ги поттикнуваше потрошувачите да купуваат надвор од земјата. Државата не само што создава порамноправни услови за сите домашни бизниси, туку се создава и простор за зголемување на надзорот врз квалитетот и безбедноста на производите коишто се продаваат и испорачуваат“, истакна Дукоски.
Според него, оваа мерка ќе придонесе за зајакнување на домашната економија и зголемување на довербата на потрошувачите кон домашните производи.
