Јужна Украина доживеа ноќ на терор по масовните руски напади со дронови, кои оставија без електрична енергија Одеса и уште 40 населени места во регионот. Локалните власти соопштија дека е нанесена значителна штета на енергетската инфраструктура, додека избувнале пожари во енергетски објект и во хотелско-ресторански комплекс во градот Одеса.
Една жена е повредена, а две лица се спасени, пренесе ДПА. Вкупно 41 населено место останало без струја. Киев ја обвинува Русија дека напаѓа енергетски објекти со цел да го лиши населението од светло и греење пред зимата и да го притисне украинското раководство да прифати мировен договор под услови на Москва, што Украина го одбива.
Истовремено, украинските сили одговорија со напади врз руски цели во текот на ноќта, во обид да ја одбранат земјата од инвазијата што Русија ја започна во 2022 година.
Министерството за одбрана на Русија соопшти дека 42 украински дронови биле соборени, најголемиот дел во јужниот регион Волгоград. Делови од соборените дронови паднале врз станбени згради, училишта и градинка, при што еден маж е повреден, а три деца се пренесени во болница поради стрес. Регионалните власти информираат за скршени прозорци и материјална штета.
