Во своите новообјавени мемоари, поранешниот генерален секретар на НАТО, Јенс Столтенберг, открива дека поранешниот американски претседател Џо Бајден го нарекол украинскиот лидер Володимир Зеленски „гњаватор“ за време на самитот на Алијансата во Вилнус.
Како што пренесуваат медиумите, инцидентот се случил зад затворени врати, за време на координацијата на конечната декларација од самитот. Американската делегација, според Столтенберг, била иритирана од инсистирањето на Киев околу формулацијата во документот што се однесува на поддршката за Украина и нејзиното идно членство во НАТО.
Иако текстот на декларацијата бил претходно усогласен со украинската страна, непосредно пред неговото објавување, Зеленски јавно изразил незадоволство на платформата X, наведувајќи дека „нејасната формулација“ остава простор за преговори со Русија во врска со пристапувањето на Украина кон Алијансата.
Според сведочењето на Столтенберг, токму таа изјава предизвикала негодување меѓу делегациите на повеќе земји-членки, особено во Вашингтон, каде што процениле дека Зеленски со тоа ги поткопува заедничките дипломатски напори и единството внатре во НАТО.
