Директорот на Данската народна банка, Улрик Ньодгор, предупредува дека живееме во време кога секој граѓанин треба да биде подготвен за можни прекини во системите – од хакерски напади до технолошки дефекти.
Банката препорачува секое домаќинство да има повеќе начини за плаќање: картички, мобилни апликации и готовина. Минималната препорачана сума е 250 дански круни по лице – околу 35 евра. Граѓаните треба сами да проценат дали им е потребно повеќе, но важно е готовината да биде во помали апоени за полесно враќање кусур.
Ньодгор истакнува дека секој треба да има најмалку две различни картички и да го знае својот ПИН-код, бидејќи повеќето офлајн плаќања функционираат само на тој начин.
Урок од Шпанија
Данците потсетуваат на големиот прекин на струја во Шпанија и Португалија, кој годинава ги парализираше продавниците и банките цели 20 часа. Тогаш се покажа дека готовината е незаменлива. „Продавниците мора да бидат подготвени и да знаат како да постапуваат со офлајн плаќања“, вели Ньодгор.
Хибридна војна и дигитален хаос
Предупредувањето доаѓа во време кога Данска се соочува со сериозни безбедносни закани. Директорот на данската разузнавачка служба, Томас Ахренкиел, изјави дека „Русија води хибридна војна против Данска“, таргетирајќи банки, водовод и други клучни системи.
Поради тоа, препораката на Народната банка да се задржи дел од парите во готово повеќе не звучи застарено – туку неопходно.
Продавниците мора да имаат план Б
Годинава, кога падна системот на платната компанија Nets, целиот дански бизнис-сектор беше парализиран три часа. Многу продавници не можеа да прифатат ниту картички ниту готовина. Затоа банката сега апелира трговците да развијат стратегии за офлајн плаќања и да го обучат персоналот како да постапува при прекин на интернет или на системот.
Готовината – осигурување во дигиталното доба
Во време на дронови, хакерски напади и кибер-воени закани, Данската народна банка испраќа јасна порака:
Готовината повеќе не е минато – туку безбедносна мрежа за иднината.
