Балкан

Аналитичар уапсен за шпионажа во корист на Србија

Полицијата на Косово, во соработка со Агенцијата за разузнавање (АКИ) и Јавното обвинителство, денес го уапси аналитичарот Фатмир Шехоли под основано сомнение за шпионажа во корист на Република Србија.

Министерот за внатрешни работи, Џелал Свечла, изјави дека случајот ќе се третира со највисок институционален сериозитет, бидејќи претставува едно од најтешките дела против безбедноста и уставниот поредок на Косово. „Времето на српските шпиони во Косово заврши. Секој што работи за Србија, а против Косово, ќе биде гонет без компромис“, напиша Свечла на Фејсбук.

Според обвинителството, против Шехоли е поднесено обвинение за кривично дело шпионажа, а по апсењето тој бил приведен пред Основниот суд во Приштина, каде му е определен привремен притвор.

Во рамките на истрагата, полицијата запленила електронски уреди, документација и други материјали кои ќе се користат како докази. Властите истакнуваат дека истрагата продолжува и дека нема привилегирани лица над законот.

Балкан

Земјотрес од 4,8 степени во Грција

Силен земјотрес со магнитуда од 4,8 степени ја погоди областа Калаврита во Грција во саботата вечер, соопшти Германскиот истражувачки центар за геонауки (GFZ). Епицентарот бил на длабочина од 10 километри, пренесува EMSC.

Првичните извештаи наведуваа магнитуда од 6,3 степени, но подоцна вредноста беше коригирана на 4,8.

Сведоци од областа пријавиле дека почувствувале силен татнеж, по што почнала да се тресе и нивната околина. „За среќа, плочките останаа на место. Епицентарот, изгледа, бил во селото Коутели кај Калаврита“, изјавиле локалните жители.

Засега нема информации за повредени или значителни материјални штети.

Балкан

Букурешт денеска гласа за нов градоначалник: 1,8 милиони избирачи на изборните места

Денеска граѓаните на Букурешт го остваруваат своето право на глас за избор на нов градоначалник. Се очекува речиси 1.800.000 луѓе да гласаат на 1.289 избирачки места и да го одредат лицето што ќе управува со најголемиот и најбогат романски град до 2028 година, со буџет од 11 милијарди леи.

Изборниот ден започна во 7 часот наутро и ќе трае до 21 часот по локално време. За позицијата, која остана празна по изборот на Никушор Дан за претседател на Романија, се натпреваруваат 15 кандидати, иако на гласачкото ливче се наведени 17 имиња поради повлекување на двајца кандидати во последен момент.

Најмладиот кандидат има 32 години, додека најстариот е 66-годишен. Победникот ќе стане 17-ти градоначалник на Букурешт од 1990 година наваму.

Балкан

Трагедија во Србија: Семјство од Босна и Херцеговина најдено мртво во куќата по неколку дена

Во семејната куќа во Чачак утрово беа пронајдени три тела на семејство од Босна и Херцеговина, но според неофицијални информации, трагичните настани се случиле неколку дена порано. Сè уште не е познат точниот датум на двојното убиство и, како што се претпоставува, самоубиството, јавува Radiosarajevo.ba.

Сомнежите упатуваат дека 47-годишниот В. Ч. ги убил своите родители, 72-годишната М. Ч. и 79-годишниот Н. Ч., а потоа, како што се претпоставува, си нанел смртоносни повреди на градите и вените. Според извори на „Блиц“, јавноста и полицијата за овој морничав случај дознале дури утрово.

Соседите се во шок, а нови информации за семејството продолжуваат да се појавуваат. Тие се преселиле во куќата од Босна и Херцеговина пред 26 години, на местото каде претходно живеело четиричлено семејство. За време на бомбардирањето на Србија, куќата била оштетена, а тогашниот сопственик извршил самоубиство во дневната соба.

Случајот е во тек на истрага, а полицијата се обидува да утврди сите околности околу трагичниот настан.