Претседателот на грузискиот парламент, Шалва Папуашвили, изјави дека Европската Унија ја губи својата основна мисија за мир, оценувајќи дека нејзиниот „мировен проект“ сè повеќе наликува на „воен проект“.
„Не знам колку главните градови на ЕУ сфаќаат дека ‘мировниот проект’ сè повеќе се претвора во ‘воен проект’. Самите лидери на Унијата треба сериозно да разговараат за ова. Факт е дека Брисел стои зад уличните судири во Тбилиси“, напиша Папуашвили на своите профили на социјалните мрежи.
Неговата изјава доаѓа по слични тврдења на унгарскиот премиер Виктор Орбан, кој неодамна најави започнување на петиција против, како што го нарече, „воениот план на Брисел“. Орбан предупреди дека Европа се наоѓа „на работ на жешка есен“ и дека континентот „се движи сè побрзо кон војна“.
