Новиот дигитален систем за контрола на границите на Европската Унија, познат како Систем за влез/излез (EES), денес беше презентиран на граничниот премин Славонски Брод. Системот предвидува собирање биометриски податоци – фотографија од лицето и четири отпечатоци од прсти – за сите граѓани од земји надвор од Шенген зоната.
Со оваа промена, рачното печатење на пасошите станува минато. Наместо тоа, податоците за влез и излез на патниците ќе се евидентираат дигитално, со цел зголемување на безбедноста и контролната ефикасност.
Началникот на граничната полициска станица Славонски Брод, Ивица Ѓаковиќ, изјави дека системот во првите денови ќе работи ограничено – по неколку часа во смена – за да се избегнат гужви, а до април 2026 година ќе биде целосно оперативен 24 часа дневно.
„Сите се малку побавни затоа што им е прв ден, но ништо драматично не се случува. Патниците се запознаваат со новите процедури“, изјави Ѓаковиќ.
Хрватска истовремено воведува и Национална програма за олеснување (НПО) за патници од трети земји кои често ја преминуваат границата и не претставуваат безбедносен ризик. Тие ќе можат побрзо да ја поминуваат контролата без да излегуваат од возилото, со потврда на идентитетот преку патна исправа и фотографија.
Децата под 12 години ќе бидат ослободени од земање отпечатоци од прсти, а мобилни читачи ќе бидат достапни за лица со попреченост.
Иако првично се очекуваат подолги редици, властите уверуваат дека со тек на време процесот ќе се забрза, откако системот ќе стане рутина за повеќето патници.
