Во американскиот Сенат неделава се отвори жестока расправа по откритијата дека осум републикански сенатори наводно биле прислушувани за време на администрацијата на Џо Бајден. Прашањето беше поставено на сослушувањето на новата државна обвинителка на САД, Памела Бонди, пред Сенатската комисија.
Сенаторот Џош Холи обвини дека Федералното биро за истраги (ФБИ) незаконски ги надгледувало телефонските комуникации на него и уште неколкумина сенатори, меѓу кои Линдзи Греам и Марша Блекбурн. „Тоа е јасно таргетирање на политички противници,“ изјави Холи, обвинувајќи ја поранешната администрација дека ја користела државната моќ за политички цели.
Холи тврдеше дека специјалниот обвинител Џек Смит, кој директно одговарал на тогашниот државен обвинител Мерик Гарланд, наредил серија истраги и прислушувања по налог на претседателот Бајден. Според него, цел на овие акции биле не само сенатори, туку и родители кои на училишни состаноци изразувале несогласување со наставните содржини поврзани со трансродовата идеологија, како и католици кои присуствувале на традиционални мисии.
„Тоа што се случувало е злоупотреба на власта без преседан,“ рече Холи, додавајќи дека ФБИ дури регрутирало информатори во католичките парохии и ги следело родителите кои се спротивставувале на политиките на Белата куќа.
Обвинителката Бонди изјави дека „не може да зборува за конкретните детали“, но нагласи дека нејзината администрација ќе ги разгледа сите наводи заедно со директорот на ФБИ, Крис Пател. Таа додаде дека „ваквите злоупотреби завршиле со новата администрација“ и дека родителите и верниците повеќе нема да бидат мета на институциите.
„Секој има право слободно да се поклонува, без разлика на верата, и да го изразува своето мислење,“ рече Бонди.
Холи, пак, повика на отворање специјална истрага за утврдување на одговорноста. „Треба да знаеме кој го наредил прислушувањето на сенаторите и кој ја злоупотребил власта за политички цели. Оние што ги прекршиле законите мора да одговараат,“ заклучи тој.
