Скопје

Смарт Скопје: Ѓорѓиевски најави целосна дигитална трансформација

Кандидатот за градоначалник на Скопје, Орце Ѓорѓиевски, го претстави планот за целосна дигитална трансформација на главниот град, преку 17 стратешки проекти што ќе го претворат Скопје во прв целосно дигитализиран, модерен и транспарентен град во државата.

„Кога зборуваме за иднината на Скопје, зборуваме за град кој функционира паметно, брзо и чесно – град во кој системот, а не врските, ја движат работата. Таков град се создава со вистинска дигитална трансформација“, истакна Ѓорѓиевски.

Тој најави формирање на Смарт Центар – организациска единица што ќе биде срцето на дигитализацијата, преку која ќе се координираат сите проекти за паметен град. Центарот ќе овозможи дигитално управување со транспорт, отпад и јавни услуги во реално време.

Во рамките на реформата, ќе се воведат Документ менаџмент систем и ЕРП систем, кои ќе ја заменат хартиената администрација, овозможувајќи „paper free“ работа, јасен дигитален траг и целосна отчетност.

Меѓу проектите е и „Дигитален близнак на Скопје“, преку кој ќе се создаде дигитална реплика на градот со интегрирани просторни податоци, сензори и документи, што ќе овозможи интелигентно урбано планирање и поефикасно управување со инфраструктурата.

Ѓорѓиевски најави и дигитализација на сите градски регистри, воведување на е-даноци, е-адреса, електронско управување со проекти и дигитална платформа за културно наследство. Со проектот SKOPJE CITY GO, граѓаните ќе имаат единствена картичка за јавен превоз, паркинг, културни и спортски настани, со попусти за ученици, пензионери и лица со попреченост.

Посебен акцент Ѓорѓиевски стави на младите:

„Сакам да изградиме град што ќе им понуди шанса, простор и поддршка да растат и создаваат овде, во Скопје.“

Тој најави ослободување од комуналии за млади брачни парови до 40 години без имот, задолжително младинско вработување, Младински центар за кариера и поддршка за млади занаетчии.

„Кога градот е дигитален, секој млад човек може лесно да учи, работи, креира и живее овде. Тоа е Скопје што ни е потребно и Скопје што ќе го добиеме“, порача Ѓорѓиевски, додавајќи дека најдоброто допрва доаѓа.

Скопје

Скопската железничка станица се враќа во живот по две децении

Еден од приоритетите на новата влада е вложувањето во инфраструктурата, вклучително и железничкиот сообраќај, како товарен така и патнички. Покрај набавката на нови локомотиви и вагони, значајна инвестиција е обновата на железничката станица во Скопје, која ќе ја врати својата функција од пред 15-20 години, кога објектот се руинираше и стана нефункционален.

Почна чистењето и средувањето на станицата, информираше директорот на Железница Инфраструктура, Синиша Ивановски. „Со цел враќање на автентичниот изглед на станицата, започнавме со отстранување на сите билборди, светлосни реклами и други информативни панели кои години наназад го нарушуваа изгледот на објектот“, напиша Ивановски на својата Фејсбук страница и им се заблагодари на компаниите кои се согласиле да ги тргнат билбордите.

Проектот ќе се реализира во фази и ќе заврши со генерално чистење на надворешниот изглед на станицата и поставување соодветна илуминација.

Скопје

Започна редизајнот на железничката станица во Скопје

Скопје – Почна чистењето и средувањето на железничката станица во Скопје, информираше директорот на Железница Инфраструктура, Синиша Ивановски.

„Со цел враќање на автентичниот изглед на станицата, започнавме со отстранување на сите билборди, светлосни реклами и други информативни панели кои години наназад го нарушуваа изгледот на објектот“, напиша Ивановски на својата Фејсбук страница. Тој им се заблагодари на компаниите кои се согласиле да ги тргнат билбордите.

Проектот ќе се одвива во фази и ќе заврши со генерално чистење на надворешниот изглед на станицата и поставување соодветна илуминација, посочи директорот.

Скопје

Голем дефект на „Крсте Мисирков“ – утре без вода клучни институции и делови од центарот на Скопје

Утре од 7 часот наутро значаен дел од централното градско подрачје ќе остане без вода поради дефект на водоводната линија на булевар „Крсте Мисирков“, соопшти ЈП „Водовод и канализација“ – Скопје.

Прекинот ќе ги опфати објектите на МАНУ, Основен суд 2, Младинскиот културен центар, Универзитетската библиотека „Св. Климент Охридски“, Универзитетот „Св. Кирил и Методиј“, трговскиот центар „Мавровка“, делови од Старата скопска чаршија, Саат-кулата, улицата „Отокар Кершовани“, Адвокатската улица и дел од булевар „Крсте Мисирков“.

Од претпријатието информираат дека екипите ќе работат интензивно на терен и дека водоснабдувањето ќе биде вратено веднаш по отстранување на дефектот.