NASA се подготвува за историска мисија Artemis III, во рамки на која астронаутите во 2027 година би можеле да откријат докази дека Месечината пред 4,3 милијарди години била погодена од огромен астероид – судар што го обликувал нејзиното сегашно лице.
По повеќе од 50 години, американската вселенска агенција се враќа на Месечината со човечка посада. Првата фаза, Artemis II, предвидена за 2026 година, ќе вклучува лет со четворица астронаути околу Месечината, додека Artemis III, закажана за 2027, ќе означи историски повраток на човекот на месечевата површина. Мисијата би можела да одговори на едно од најголемите прашања за формирањето на Месечината.
Според ново истражување на Универзитетот во Аризона, објавено во престижното списание Nature, голем удар од астероид е одговорен за создавањето на „ударниот базен Јужен пол–Ајткен“, едно од најстарите и најголемите кратерски подрачја во Сончевиот систем. Овој удар, според научниците, објаснува зошто блиската страна на Месечината е релативно мазна, додека далечната е покриена со кратери.
Астронаутите ќе слетуваат на долниот раб на базенот Јужен пол–Ајткен, што е најдобрата локација за анализа на материјали од најдлабоките слоеви на Месечината. Главен фокус ќе биде и проучувањето на КРЕЕП (калциум, ретки земјени елементи и фосфор) – редок вид месечеви карпи кои можат да откријат детали за раната еволуција на Месечината и формирањето на нејзината кора.
Доколку мисијата успешно ги собере и анализира примероците, човештвото би можело да добие најпрецизен увид во историјата на Месечината и можеби во раните фази од формирањето на Земјата.
