Република

Нови перспективи за Прилеп – Проданоски со визија за населбата „Градина“

Кандидатот за градоначалник на општина Прилеп, Дејан Проданоски, ја претстави својата визија за развој на градот, со акцент на создавање на достоинствен и современ живот за сите граѓани.

Еден од клучните проекти што тој го најави е изградбата на новата населба „Градина“, која треба да стане пример за урбан развој и стандарди за долги години напред. Населбата ќе се наоѓа на просторот на поранешните оранжерии, на само 1,5 километар од центарот на Прилеп, и ќе опфаќа површина од 42 хектари, со капацитет за околу 13.000 жители.

Во рамките на проектот се предвидени над 420 градежни парцели за станбени куќи, згради, деловни и трговски објекти, како и инфраструктура за училишта, градинки, спортски и рекреативни центри. Проданоски најави широки улици, тротоари, велосипедски и пешачки патеки, енергетски ефикасно осветлување, централно греење и големо зеленило, со цел населбата да биде безбедно и здраво место за живеење.

„‘Градина’ ќе биде место каде што ќе растат деца, ќе се создаваат семејства и ќе се гради иднина. Со овој проект сакаме да им дадеме причина на младите да останат во Прилеп и да ја гледаат својата иднина тука, дома,“ изјави Проданоски.

Проектот, како што нагласува кандидатот, не создава само нова населба, туку и нова енергија, перспектива и гордост за сите прилепчани, со цел Прилеп да стане европски, зелен и современ град.

Видеото може да го погледнете тука

Република

„Шпанец“ се враќа на пругите: Модернизиран и подготвен за патници

Легендарниот воз „Шпанец“, некогаш заборавен и речиси отпишан, се враќа на пругите со целосно нов лик. Денес беше тестирана обновената верзија на возот, кој сега располага со модерен дизајн, телевизори, озвучување, алармни системи и видео надзор.

Одговорните најавуваат дека подготовките за поудобно и побезбедно патување се во полн ек, со цел патниците да уживаат во современо и безбедно патување.

Следуваат уште новости за враќањето на овој легендарен воз – останете со нас за сите детали.

Видеото може да го погледнете тука

Република

После многу години конечно Тетово ќе се украсува

На онлајн седница одржана денеска, 12 декември 2025 година, Советот на Општина Тетово со мнозинство гласови донесе одлука за украсување на градот за претстојните новогодишни празници.

„За оваа програма „за“ гласаше советничкото мнозинство составено од Коалицијата „Вреди“ и ВМРО-ДПМНЕ, додека против беа советниците од коалицијата НАИ. Воздржани беа од Подобро за Тетово, Левица и СДСМ. Со оваа одлука, Општина Тетово ја потврдува намерата градот да добие празничен сјај за крајот на 2025 година“, изјави претседателот на Советот, Јусуф Абдули.

Истовремено, изгласана е измена на Програмата за активности на Општина Тетово во областа на културата за 2025 година. Според новата програма, за празничното украсување се предвидени еден милион и петстотини илјади денари, што е над 24 илјади евра.

Република

Коњановски ги прими просветните работници на годината од Битола

Градоначалникот на Битола, Тони Коњановски, денеска оствари средба со добитничките на признанието „Просветен работник на годината“ за учебната 2024/2025 година – Наташа Тодоровска, наставник по одделенска настава во ОУ „Ѓорѓи Сугарев“, и Аница Б. Златевска, психолог во ОУ „Коле Канински“.

Коњановски им честиташе за значајното признание доделено од Министерството за образование и наука и Сојузот на просветни работници, нагласувајќи дека ваквите награди се симбол на поширока општествена заложба за почит и вреднување на улогата на наставниците, воспитувачите и стручните соработници во образованието.

Тој истакна дека трудот на просветните работници е фундаментален за формирањето на идните генерации и дека локалната самоуправа ќе продолжи да ја поддржува нивната работа.

Признанијата се доделуваат во рамките на кампањата „Магијата е во знаењето“, која Министерството ја реализира по повод 5 Октомври – Светскиот ден на учителите, со цел истакнување на незаменливата улога на учителите и зголемување на општествената почит кон нив.