Скопје

Ѓорѓиевски: Младите се иднината на Скопје – време е градот да им ја врати шансата

Кандидатот за градоначалник на Скопје, Орце Ѓорѓиевски, денеска истакна дека иднината на главниот град е нераскинливо поврзана со младите и нивниот потенцијал. На средба посветена токму на младите генерации, тој ги претстави клучните проекти од својата програма што, како што рече, им ја отвораат вратата кон посовремена и поправедна иднина.

Ѓорѓиевски го најави воведувањето на „SKOPJE CITY GO“, единствена картичка што ќе ги обедини сите градски услуги – јавен превоз, паркинг, културни и спортски билети, со попусти и бесплатни услуги за ученици, пензионери, невработени и лица со попреченост.

Преку проектот „AI Скопје“, најави дигитализација на градот, зголемена безбедност, ефикасност и одржливост, а младите ќе бидат вклучени преку хакатони, урбани лаборатории и иновативни решенија.

„Мојата цел е да изградиме град што им нуди шанса, простор и поддршка на младите да останат, да создаваат и да ја градат својата иднина тука, во Скопје“, порача Ѓорѓиевски.

Како дел од мерките, тој најави ослободување од комуналии за младите брачни двојки до 40 години без друг имот, мерка што веќе се покажа успешна во Кисела Вода.

Ѓорѓиевски најави и задолжително младинско вработување, со обврска секоја средна и голема компанија да вработува најмалку еден млад човек до 25 години на секои 20 постојни вработени – модел инспириран од германското и холандското искуство.

Преку Младинскиот Центар за Кариера ќе се обезбедува менторство, обуки и поврзување со работодавачи, а проектот „Учи занает, гради иднина“ ќе обезбеди стипендии, субвенции и современа опрема за младите занаетчии.

Меѓу најавените иницијативи се и „Disco Zone“ – зони за летни дискотеки и клубови надвор од центарот, дигитални станбени хабови, зелени зони и проектот „Паметно семејство“, насочени кон создавање современи услови за младите брачни парови и повратниците од странство.

„Кога градот е дигитален, младите можат да учат, создаваат и живеат овде. Кога тие остануваат, градот расте, станува поотворен, поиновативен и похуман“, изјави Ѓорѓиевски, додавајќи дека Скопје мора да биде град што создава можности и работи со транспарентност.

Тој ги повика граѓаните во недела масовно да излезат и да гласаат за број 9, „за иднината на младите и иднината на Скопје“, нагласувајќи дека – најдоброто допрва доаѓа.

Македонија

ДЕНЕСКА НА МРЃУНАРОДНИОТ АЕРОДРОМ СКОПЈЕ – Реализирани 26 летови, по 13 слетувања и полетувања поради лошите временски услови

По периодот на прекин поради густа магла, Меѓународниот аеродром „Скопје“ повторно е отворен за сообраќај, соопштија од аеродромските служби.

Денеска се реализирани 13 слетувања и 13 полетувања, откако претходно системот на летови беше значително нарушен од временските услови.

Значителен број летови сè уште почувствуваа последици од маглата – 20 летови беа пренасочени кон други аеродроми, а две планирани авиони беа откажани, додека аеродромот работеше со ограничено функционирање.

Аеродромските оператори потврдија дека ситуацијата на пистите и навигациските системи се нормализира и дека сообраќајот постепено се враќа во вообичаениот режим. Патниците често пати беа известувани директно од авиокомпаниите за измените во нивните летови, вклучувајќи и за пренасочените и откажаните услуги.

Од аеродромот апелираат до патниците да ги проверат состојбите и статусот на нивните летови пред да пристигнат на терминалите, поради можни дополнителни измени што може да се појават при променливи временски услови.

Со обновувањето на летовите, се очекува нормализација на сообраќајот и олеснување за сите што планираат патување преку скопскиот аеродром во текот на денот.

Скопје

НИГЕРИЕЦ ВООРУЖЕН СО ПИШТОЛ УАПСЕН ВО СКОПЈЕ ПО НАПАД ВРЗ ПОЛИЦАЕЦ НОЌВА ВО ГРАДСКИОТ ПАРК

Ноќеска во Градскиот парк во Скопје, полициски службеници го лишиле од слобода 37-годишниот У.И.У., државјанин на Нигерија со американски пасош и лична карта, поради тоа што физички нападнал полициски службеник додека тој извршувал службени дејствија, соопштија од МВР.

Инцидентот се случил околу 04:30 часот пред угостителски објект во централниот градски парк, кога полицијата интервенирала поради агресивното однесување на осомничениот. За време на контролата, тој нападнал еден од полициските службеници, по што бил лишен од слобода.

При претрес кај него, полициските службеници пронашле и одзеле пиштол „глок“, две рамки и 30 куршуми, за кои лицето не поседувало соодветна дозвола, соопшти МВР. За овие предмети е утврдено дека не биле законски пријавени или регистрирани.

По целосното документирање на случајот, против 37-годишниот маж ќе следува соодветен поднесок за кривични дела, вклучувајќи напад на службено лице и поседување оружје без дозвола, додаваат од полицијата.

Скопје

Густа магла предизвика застој на скопскиот аеродром

Густата магла во скопската котлина денеска предизвика пореметување во авиосообраќајот на Меѓународниот аеродром Скопје, при што неколку летови доцнат, а еден е откажан. Временските услови влијаат на слетувањата и полетувањата, информираат од аеродромот.

Најголемо доцнење е регистрирано кај летот на „Пегасус“ од Истанбул (Сабиха Гокчен), кој наместо во 09:55 ќе слета во 11:25 часот. Летот на „Виз Ер“ од Дортмунд ќе пристигне со половина час доцнење, додека летот на „АЏет“ од Истанбул, предвиден за пладне, е откажан. Летовите од Нирнберг, Фридрихсхафен и Виена засега се реализираат според распоредот.

Доцнења има и кај заминувањата. Летот на „Виз Ер“ за Париз (Бове), предвиден за 12:25, ќе полета во 13:00, а летот на „Туркиш Ерлајнс“ за Истанбул е одложен за 1 час и 20 минути, со полетување во 14:20. Аеродромот ги советува патниците редовно да ја следат официјалната веб-страница за најнови информации.