Кандидатот за градоначалник на Скопје, Орце Ѓорѓиевски, ја претстави својата визија за модерно, дигитално и еколошки одржливо образование, најавувајќи изградба на две нови средни училишта и целосна енергетска трансформација на сите постојни училишта во главниот град.
Според неговата програма, нови современи средни училишта ќе се изградат во Драчево — нов објект за СУГС „Браќа Миладиновци“, и во Ѓорче Петров — нова зграда на „Кочо Рацин“. Ѓорѓиевски истакна дека овие училишта ќе бидат дигитализирани, енергетски ефикасни и прилагодени на потребите на современото образование.
„Нема посветла инвестиција од онаа во умот и срцето на едно дете. Ако сакаме Скопје да биде вистински европски град, мора да вложиме во генерациите што доаѓаат после нас“, рече Ѓорѓиевски, додавајќи дека образованието е темелот на секој напреден град.
Во рамките на најавената програма, секое средно училиште ќе добие фотоволтаици, нови фасади, термоизолација и паметни системи за следење на потрошувачката на енергија. Ќе се воведе и дигитализација со брз интернет, смарт табли, проектори и дигитални содржини.
Една од најиновативните мерки е воведувањето на AI личен тутор – дигитален асистент достапен за секој ученик, кој ќе помага во учењето и ќе ги заменува скапите приватни часови. Планирани се и AI лаборатории со 3D модели и интерактивни симулации во неколку училишта.
Ѓорѓиевски најави и рестартирање на Планетариумот во МКЦ, кој ќе стане центар за наука, култура и технологија, како и поставување на пречистувачи на воздух и енергетски ефикасни системи за климатизација во сите училишта.
Во фокусот на неговата програма е ученикот – со проектот „Младински оброк“ ќе се обезбеди субвенциониран оброк за секој средношколец преку Skopje City GO картичката. Првенците на генерација ќе имаат можност за бесплатно патување низ Европа, а девојчињата ќе имаат бесплатен пристап до хигиенски производи.
Ѓорѓиевски најави и формирање младински клубови за уметност, музика, театар и технологија, како и кариерни центри за помош при изборот на професија.
„Оваа програма не е само план за подобри училишта – ова е стратегија за подобро општество. Образованието е клучот што ги отвора сите врати“, порача Ѓорѓиевски, додавајќи дека со овие проекти Скопје ќе стане град каде секое дете има шанса, секој наставник поддршка, а секоја училница – иднина.
