Инфаркт „вдовица“ – тивок убиец без предупредување
Инфарктот познат како „вдовица“ настанува кога крвен тромб целосно ја блокира левата предна силазна артерија (LAD), една од главните артерии што го снабдуваат срцето со крв. Овој тип на срцев удар, медицински наречен акутен инфаркт со подигнат ST сегмент (STEMI), е најтежок и бара итна медицинска интервенција – отворање на запушениот крвен сад преку коронарографија. Без брза реакција, исходот често е фатален.
Симптоми
силна болка или притисок во градите
краток здив
забрзано или неправилно чукање на срцето
болка што се шири во раце, грб, врат или вилица
вртоглавица, слабост, потење, повраќање или несвестица
Лечење
При сомнеж за инфаркт, неопходна е итна медицинска помош. На пациентот му се даваат аспирин, лекови за разредување на крвта, кислород и нитроглицерин, а тромбот се отстранува со перкутана коронарна интервенција (PCI) – постапка при која се вметнува катетер и стент за повторно отворање на артеријата.
Во потешки случаи се врши бајпас операција или замена на оштетен срцев залисток. Пациентите обично престојуваат во болница неколку дена под внимателен надзор.
Ризик и превенција
Ризикот од смртен исход е највисок кај оваа форма на инфаркт. Најзагрозени се постари лица, пушачи и пациенти со дијабетес, висок притисок или хронични болести.
За превенција се препорачува здрава исхрана, редовна физичка активност (најмалку 150 минути неделно), откажување од пушење и контрола на холестеролот и крвниот притисок.
Лекарите предупредуваат: навремената реакција и здравиот стил на живот можат да спасат живот.
