Во дебатата на Телевизија 24, кандидатот за градоначалник на Битола од редовите на ВМРО-ДПМНЕ, Тони Коњановски, реагираше на тврдењата на Габриела Илиевска околу изградбата на депонија во градот.
Коњановски посочи дека тоа е класично лицемерие и замајување на јавноста. Тој истакна дека службениот гласник на кој се повикува Илиевска е одлука изгласана од неа во 2018 година, на 10-тата седница на Советот, за давање согласност за основање на регионална депонија и потребна инфраструктура за Пелагонискиот регион. „Целата постапка е започната уште во 2014 година, со физибилити студија и заем од Европската банка за обнова и развој од 55 милиони евра. Не зборуваме за депонија, туку за систем за управување со отпад, кој не е лоциран во Битола, туку во општина Новаци“, појасни Коњановски.
Тој додаде дека актуелниот состав на Советот, вклучително и Габриела Илиевска, гласал за предлог-одлука за меѓуопштинска соработка за основање на заедничко јавно претпријатие за регионално управување со отпад.
Коњановски нагласи дека граѓаните треба да знаат дека проектот е дел од долгорочен регионален систем за управување со отпад, а не локална депонија во Битола.
