Орце Ѓорѓиевски, кандидат за градоначалник на Град Скопје, ги повика граѓаните на обединување и акција за развој на градот, нагласувајќи дека неговата визија е Скопје да биде општина за сите, без разлика на етничка, верска или партиска припадност.
„Мојата рака е подадена кон сите – Албанци, Турци, Роми, Бошњаци, Власи, Срби и сите кои го сакаат Скопје“, порача Ѓорѓиевски пред жителите на општина Сарај, која ја опиша како вистински бисер на главниот град.
Кандидатот истакна дека неговата цел е да работи подеднакво за секој човек, во секоја општина и маало, додавајќи дека поделбите се минато и дека иднината на градот е поважна од секоја разлика.
Ѓорѓиевски претстави конкретни проекти за Сарај, меѓу кои уредување на кејот на Вардар со пешачки и велосипедски патеки, изградба на монтажен паркинг кај Матка, ново осветлување на Горна Матка и изградба на канализациона мрежа во Долна Матка. Главната улица ќе биде реконструирана, а патот до браната Матка ќе се рехабилитира за полесен и побезбеден пристап до центарот и другите општини.
Ѓорѓиевски истакна дека неговата програма „Визија за Скопје 25/45“ предвидува и завршување на клучните сообраќајни проекти, како клучката „Момин Поток“ и изградба на новите булевари „Хрватска“ и „Цветан Димов“, како и развој на културните и туристичките локалитети во градот, вклучувајќи го Скопското Кале и Старата чаршија.
„Скопје е богато токму поради различноста на неговите култури, традиции и јазици. Албанската, македонската, турската, ромската и бошњачката култура се дел од нашиот мозаик што нè прави уникатни и посилни“, порача Ѓорѓиевски, нагласувајќи дека како градоначалник ќе ги негува и промовира овие вредности.
Кандидатот ги повика граѓаните масовно да излезат на изборите и да дадат мандат за реализација на проектите уште од првиот ден, нагласувајќи дека време е за работа, за почит и за заедништво.
„Да изградиме мостови на соработка, а не ѕидови на недоверба. Да работиме за развиено, европско и просперитетно Скопје – за иднината на нашите деца и за сите нас“, заклучи Ѓорѓиевски.
